Յուրաքանչյուր պետության կայունության ապահովման և հավասարակշռված զարգացման պարտադիր գործոն և հիմնասյուն է հանդիսանում արդյունավետ գործող պետական ծառայության համակարգի առկայությունը։ Պետական կառավարման համակարգում արդյունավետ, հավասարակշռված և միասնական կադրային քաղաքականություն իրականացնելու, համակարգը քաղաքական հարաբերակցության փոփոխությունից անկախ պրոֆեսիոնալ կադրերով ապահովելու, ծառայողների իրավական պաշտպանվածությունը և օրինական շահերը պաշտպանելու նպատակով 1998 թվականից նախաձեռնվեց «Քաղաքացիական ծառայության մասին» ՀՀ օրենքի մշակումը, որը ՀՀ Ազգային ժողովի կողմից ընդունվեց 2001 թվականի դեկտեմբերի 4-ին։ Քաղաքացիական ծառայության միասնական պետական քաղաքականությունն իրականացնելու նպատակով, 2002 թվականին ստեղծվեց Քաղաքացիական ծառայության խորհուրդը։

    Քաղաքացիական ծառայության խորհուրդը հանդիսացավ այն հիմնադիր մարմինը, որն իրականացրեց ՀՀ-ում քաղաքացիական ծառայության համակարգի ներդրումը, սկզբնական կայացումը, զարգացումը և հիմնական օրենսդրական բազայի ստեղծումը։  2015 թվականի Սահմանադրության փոփոխությունների, պետական կառավարման համակարգի զարգացման և կայացման, արժանիքահեն, արդար և թափանցիկ, բոլորի համար հավասար հնարավորություններ ապահովող, արհեստավարժ և արդյունավետ գործող, հանրային կառավարման միջազգային լավագույն օրինակներին համապատասխանող քաղաքացիական ծառայություն ունենանելու հրամայականով պայմանավորված մշակվեց և 2018 թվականի մարտի 23-ին ընդունվեց «Քաղաքացիական ծառայության մասին» ՀՀ նոր օրենքը։ Նոր օրենքի պահանջով դադարեց Քաղաքացիական ծառայության խորհրդի գործունեությունը, իսկ քաղաքացիական ծառայության ղեկավարման և միասնականության ապահովման լիազորությունը վերապահվեց վարչապետի աշխատակազմի քաղաքացիական ծառայության գրասենյակին։

    Քաղաքացիական ծառայության գրասենյակին վերապահվեց նաև պետական մարմիններում աշխատանքի վարձատրության քաղաքականության մշակման գործառույթը: Դրանով պայմանավորված՝ Կառավարության 2014 թվականի հոկտեմբերի 2-ի N 1074-Ն որոշմամբ  «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» Հայաստանի Հանրապետության օրենքի կիրարկումն ապահովող` Հայաստանի Հանրապետության կառավարության լիազոր մարմին ճանաչվեց Հայաստանի Հանրապետության վարչապետի աշխատակազմի քաղաքացիական ծառայության գրասենյակը:

     Քաղաքացիական ծառայության գրասենյակն իրականացնում է հետևյալ գործառույթները՝

• Քաղաքացիական ծառայության համակարգի հետ կապված ուսումնասիրությունների իրականացում
•  Իրավական ակտերի նախագծերի մշակում
• Վարկանիշային ցուցակների համար թեստավորման անցկացում և ցուցակների առցանց վարում    
• Մրցույթների թեստերում ընդգրկվող կոմպետենցիաների վերաբերյալ առաջադրանքների կազմում
• Կոմպետենցիաների վերաբերյալ վերապատրաստումի կազմակերպում
• Պետական մարմիններում աշխատանքի վարձատրության քաղաքականության մշակում
• Գլխավոր քարտուղարների թափուր պաշտոն զբաղեցնելու մրցույթների կազմակերպում և անցկացում
• ՄՌԿ տեղեկատվական հարթակի վարում
• Մեթոդական ղեկավարում և վերահսկողություն
• Մեթոդական ցուցումների տրամադրում
• Անձնակազմի կառավարման աշխատանքների կազմակերպման համար ուղեցույցների մշակում
• Վերլուծությունների իրականացում
• Մոնիթորինգի իրականացում
• Օրենսդրությամբ նախատեսված այլ գործառույթների իրականացում: